كل سنه بيجى رمضان تلاقى الدنيا اتغيرت تماما وكل سنه فيه اسئله دايما دايما بتطرح نفسها مثلا
السؤال الأول :ليه الجوامع بتتملى فى رمضان عن اى شهر تانى ؟
مش يمكن الناس دى بتصلى فى اماكن تانيه يعنى مثلا فى البيت او الشغل او اى حته تانيه , بس الاكيد لأ , لان الجوامع بدون استثناء بتتملى فى اى فرد فى رمضان , يعنى الناس عندها الامكانيه انها تصلى فى كل الاوقات ودى حجه مش تمام .
السؤال الثانى : ليه الناس بتبدأتقل من الجوامع بمرور الايام فى رمضان ؟
الأكيد لانهم متعودوش على كده بيفكرونى بالفرق زى بتروجيت والحرس اللى نفسُه فى الدورى قليل ومش ممكن يحصل على بطوله مش زى الاهلى ولا الزمالك" اعتباريا "!!!؟؟
السؤال الثالث : ليه بأه عدد الناس اللى مبتصليش المغرب زى عددهم فى الفرود التانيه ؟
والحقيقه ان الاجابه هنا سهله شويه , وهى ان الناس دى " الزياده بيتوع شهر رمضان بس " مبتفكرش فى الصلاه فى الوقت ده خالص ,لأنه بيقول لنفسه " مش العكس !!!!" هتقوم وتسيب الاكل والعصير و......الخ .
السؤال الرابع : هى الناس مصلتش تراويح الليله الاولى ليه ؟هاه ليه ؟
وده برده مش عايز فزلكه , لأن الناس متعرفش ان رمضان بيبدأ من الليله اللى بتسبقه لكن على العكس تماما فاكره تروح تجيب السحور.
السؤال الخامس : هو احنا ليه بنحس ان النشاط فى الجوامع من تنظيف وتظبيط الصوت بيزيد فى الشهر ده بس ؟
ودى حاجه غريبه فعلا انك تلاقى السلالم الطويله بتاعة الجامع اللى دايما شايفها مركونه جنب الجزامه تصول وتجول الجامع لتنظيف الاسقف وتصليح لمبات الكهرباء وتظبيط الصوت .
السؤال السادس : هى القهاوى بتتملى ليه بعد صلاة الراويح ؟؟؟
انت مجنون يابنى ولا ايه الاجابه سهلــــــــــــــــه وهى اننا مش صايمين يعنى ناكل ونشرب ونتكلم فى سيره الناس ونشوف البنت المعديه من قدام القهوه , خلى الواحد يطلع كبت النهـــــار ايــــــــــــــــــــــــــــــــــــه هو هيبقه لـــيـــــل ونهار ؟
السؤال السابع والأخير : هي ليه المواصلات بتتملى بالناس اللى تلقاها قاعدة تقرأ فى المصحف " ملحوظه " مش حرام انك تقرأ فى الشهور التانيه ؟
الغريبه انه لو حد كلمه وقله مثلا " وسع يا استاذ " يقوم قايل بصوت عالى " الــــلــــهـــم انـــــى صــــــايــــــــم "؟؟؟
على فكره ملحوظه مهمه جدا جدا جدا : انا ممكن اكون واحد من الناس اللى بيعملوا الحاجات دى لكن ده مش وحش وربنا بيقرب العباد للعباده فى رمضان لكن المهم الاستمراريه
وعلى رأى المثل :اللي شايل قفة مخرومة تخر على راسه "وطبعا على حسب هى فيها ايه " ؟؟
