ابتلاء كرة القدم وخسارة مصر من الارجنتين

لو ربنا ابتلاك بحب مبارايات كرة القدم فده عادى واما اذا كنت ممن لا يمارسونها ايضا مثلى فهذا ابتلاء أكبر اما اذا كنت من محبى متابعة المنتخب المصرى فهذا ابتلاء - أما لو كنت بتشجع الزمالك مثلى فهذا لم يعد ابتلاء انما هو قدرك ان تعيش تعيس بارادتك - لكن كلة كوم ومنتخبنا ده كوم تانى انا نفسى اتفرج له على مباراه يا اما انه يتغلب فيها بالخمسة والسته وساعتها أكيد مش هتابعه زى مثلا هل حد فينا بيتابع الكرة المائية او تنس لمنتخب مصر لا طبعا أو انه يكون فريق عالمى له مستوى على الاقل ثابت بيلعب مع البرازيل بقوة وبيلعب كمان مع موريشيوس بنفس القوة  .

منتخب مصر للشباب 2011

 
لكن انه يحسسك انه فاضل تكه اهو ونغلب بأه او نوصل كاس العالم ويقوم حاجه دايما من اتنين يا اما الحكم يطلع تعبان وملوش فى الكرة أو مضايق مننا يا اما نكون بنلعب مع فريق من شمال افريقيا . لكن طبعا ازاى لازم يكون فيه تحابيش انت عارف المصريين يحبوا "يجودوا" فتجدهم مره يستهترون بالفريق طول المبارة لغاية ما يسجل المنافس جول عندها يبدأوا يوفوقوا خاصه فى اخر 5 دقايق او يغلب على اللعب العشوائيه والسرعه وطبعا هنا بفتكر ناديى العظيم الزمالك ملك اللعب بتسرع وعشوائيه خصوصا لما يكون مغلوب وده اللى حصل فى مبارتنا مع الارجنتين اللى الحكم كان فيها فلة ولبسنا فى الحيطة يلا مش مشكله لكن المشكله بأه ان لو الشباب ده والجيل ده راح فى الهوا والمنتخب الكبير مش هيستفيد منه او لو جالهم عروض احتراف وتمسك الاندية بيهم وكانهم حالفين لازم يهبطوا مع الفريق لدورى الدرجه التانيه زى محمد صلاح والنينى فى المقاولين وغيرهم فى انديه تانية .

لماذا ثار المصريون ؟

سأكون كاذابا إن قلت أني اعرف كل الحقيقه......الحقيقة هي اكثر تعقيدا من ان يجمعها شخصا ما ((مصري كان او غير مصري)) في سطور ولكن اكاد ادعي اني كمثل الكثيرن نعرف بعض الحقيقه ...بعض الاسباب...بعض الفظائع !.

ثار المصريون لانهم قد خدعوا ومنذ زمان الفراعنه ...(ابناء الآلهة) كما كان الكهنة يقولون وينشرون بين المصريين من اكاذيب ليكسبون الكثير من اموال وسلطات وفتايات نضرات .... ثار المصريون لانهم ادركوا ان حكامهم ليسوا آلهة ولا انبياء ولا صديقين ولا حتي صالحين !. 

ثار المصريون لانهم تعبوا ..تعبوا من التذلل لكل حاكم بامره يقتطع نصف ارض مصر ونصف خيرها ونصف خزينتها في جيوبه وفي جيوب حاشيته وجيوب كهنته وجيوب حاشية الحاشية......والمصري صاحب المال الحقيقي وصاحب الارض الحقيقي لا يجد الا فتاتا تناثر من فم اصحاب السلطه والبطش والعنطظة.....

ثار المصريون لانهم حين قرروا ان يكونوا موظفين في بلاط صحاب السمو الملكي وخدما للملك وحاشيه الملك واتباعهم لم يسلموا...كان عليهم ان يموتوا وهم يبتسمون..... ينتحروا في صمت حتي لا ينزعج الملك وحاشيته من صوت الآه....وكان عليهم ان ياكلوا خبزهم المبلل بالخوف والدموع ويسجدون للملك خمس مرات في اليوم والليله ....وقبل النوم يدعون للسلطان بدوام الصحة والعافيه ولابناء السلطان بالصحة والعافية ولكب السلطان بالصحة والعافية ....وفي احلامهم ممنوع الحديث بسوء عن السلطان وعن رجال السلطان .

ثار المصريون لانهم ملوا من كل مغرور يجلس علي كرسي الحكم ويدعي العفاف ويدعي الـصلاح..... يدعي انه مخلصهم وانه حاميهم وانه موحدهم ....ملوا من الفراعنه الذين تناوبوا استعبادهم في الحياة الدنيا وحتي في الحياة الاخري ....يخدمونهم في الحياة الدنيا ويدفنون الي جانبهم كي يخدمونهم في الآخرة...!!

ثار المصريون لانه لم يكن هناك حل آخر اما الثورة او الموت ...الهواء فاسد والماء فاسد والطعام مسرطن والفلوس في جيوب لصوص النظام وحدهم والحرية بعيدا عن احلامنا و الديموقراطية كذبة كبيرة بعيدة المنال...  

ماذا خسر العالم بكوسة المصريين

للكوسة فى حياتى مآسى وذكريات فعلى الرغم من كرهى الشديد والعنيف للكوسه الا انى ارغمت على أكلها وكانت بدايتى مع الكوسه فى اول اسبوع فى المدينه عندما اندهش زملائى من شدة اندهاشى لكميات جرادل نعم جرادل الكوسه فى مطعم المدينة وكيفية صبها من جردل بلاستيك الى آخر لا اكثر آدمية من سابقه وتقديم عم طنطاوى لى مع ابتسامه اكبر من وجهه الصغير .

عندئذ فقط ومع أول كلب خارج المطعم والغربان وهم ياكلون بقايا الكوسه ومع رؤيتى لهذا الكلب ابن الكلب الذى ادخل السرور على قلبى فى هذا اليوم الحزين فرغم كميات الكوسه - كوسة الشعب -  التى ياكلها الا انه هزيل جدا وابتسمت ابتسامه صغيره .

فعلى الرغم من معرفتى للكثيرين فى الدراسه يكرهون الكوسه الا انهم اجبروا على تذوقها حتى ان البعض منهم احبها هى وابتسامه عم طنطاوى والكلب - رغما عنه - حتى تتخرج من الكليه وتعيش الواقع وتعلم الحقيقه المره وهى ان 

 

الشعب كله أحب الكوسه وتعايشوا معها - رغما عنهم - جميعــــــا .

وتاريخ الكوسة فى مصر قديم قدم انسان الغاب - اللى دوشوا دماغنا بيه فى ايام الدراسه بتاعه مصر ذات الموقع الجغرافى المتميز - والتاريخ - الذى نفتخر او لا نفتخر به مش قصتنا دلوقتى - وكلنا يعرف قصة الفلاح الفصيح قبل 2200 ق م اى من حوالى 4210 عام اذا كنت لازلت اجيد الرياضيات - الله يخربيتك يعادل يا نسيم مطرح مانت موجود - فهى ليست بالشئ الجديد لكنها فقط تضخمت كما يتضخم جلندايزر فى اساطير الكرتون وكما يتضخم الكيان الصهيونى فى حقائق الغرب .

ولكن دائما ما يكون هناك العداله والمرأه المعصوبة الأعين اللممسكه بالميزان والسيف لازالت تضع العصابه وتصمد وهى تمسك بالميزان وتحارب بالسيف من يحاول ان يقترب منها ولكن اصحاب الكوسه الجدد لم يحاولوا تعديل كفة الميزان ولكنهم  خلعوا العداله من جذورها فلم يكونوا واحد او اثنين ولكنهم تضاعفوا  فلم تستطع ان تدافع عن نفسها  " العداله " .

ومن دواعى السخريه انهم اخذونا - الجيل الجديد - غدرا فعلمونا فى المدارس وحتى فى افلام الكارتون ان الخير وجلندايزر والكابتن ماجد يفوزون فى النهايه لكنهم لم يعلمونا كيف نحاربه ومتى تكون النهايه وهل لنا دخل فى تسريع هذه النهايه التى لاتأتى الا بعد ان يفوز الشر لعقود وقرون ويموت الأخيار بالمئات والآلاف دون رؤيه هذه النهايه   .  

لقد فعلت الكوسه بالشعب المصرى مالم يستطع عليه الصليبيون ولا الهكسوس ولا حتى اسرائيل فلقد اذلت المعز واعزت المذل وقتلت الضمير فى اصحاب الضمائر فماتت الحقوق وعاشت الأباطيل وكانت لها تأثير أشد من تأثير الكأس والغانيه على أمة محمد .

وبالحديث عن خسارة العرب لما فعلته كوسة المصريين فهم اول الخاسرين لانها طالما كانت مصر هى العدو الأول لأى متربص بأى دوله عربيه - كما يقول التاريخ - ولطالما كانت نهاية اى معتد على الشرق الأوسط على يد المصريين ناهيك عن ان الخليج - فى رايى فقط - لا يستطيعون تحريك ساكن من كثرة البهائم فى رؤوسهم وبطونهم والشمال الافريقى الذى تأثر الى الآن بلغة المحتل .

أما عن خسارة العالم من كوسة المصريين فلقد خسروا نوابغ فى العلم فالكل يعلم تمام العلم من هو المصرى عندما تعطى له نفس الامكانيات التى تعطيها للآخر وتحاول تقارن بينهما فى الغالب لن تجد وجه للمقارنه لصالح المصرى وقد برزت فى عدة اسماء ساعدها الله بالابتعاد عن الكوسه ولم تمتد صلصة الكوسه الاثمه اليها فقد كان من الممكن جدا ان نجد اينشتاين مصرى او نيوتن او بلانك او ........

والأكيد ان العالم خسر القيادى المصرى الذى يحكم بالعدل والانسانيه التى يقود بها العالم الى مستقبل افضل بعيدا عن الحروب الصراعات فلم لا تحكم مصر العالم وبالتأكيد لن تتحكم فيه كما يتحكم به الغرب وامريكا بالكوسة الامريكيه والغربيه - تفتكر هتكون اطعم ؟ - ولكن هناك الكوسه يطعمونها للذين يتعاملون مع الدول وليس للذين يتعاملون مع شعوبهم .

بالتأكيد تؤدى النظريه العلميه للكوسه المصريه والتى تنص على " لا تلقى لضميرك قطعة خبز يتغذى عليها فقد يكبر ويطيح بك وانك انت افقر فقير فى الكون فحارب من يحاولون تصويرك عكس ذلك ولاتساعد اخاك ظالما ولا مظلوما " والقاعده المعروفه " كوّس اكتر واكتر فرصتك فى العلو تكبر وتكبر " الى انه كلما صادفك الحظ السئ واليوم الأسود ان ترى وجوههم تجد انهم مترابطين يعرفون بعضهم البعض ومعتصمين بصلصة الكوسه وله سعيد الحظ الوافر من الدنيا والعاثر من الله والآخره من يسقط فى هذه الصلصه التى لاتحترق ولا تتبخر فلا تعلم من اين وقودوها فتجدهم فى كل مكان فى المصانع والشركات والمكاتب والمدارس والجامعات والسفارات والورش و............. فاصبحت من القاعده الى راس المثلث فاسدين يدخلون الى مثلثهم من يبيع دينه بعرض الحياة الدنيا ويحاربون من تسول له نفسه الاقتراب منهم ومن وضعهم حتى ارتقى فيهم الاكثر رهبه وظلما وعدوانا على الحق وهو اجهل من ابو جهل بدين محمد - عليه الصلاة والسلام - وتركوا العلماء والمجتهدين واصحاب العقول والافكار الى ان ياكلوا كوسة الشعب التى لا تسمن ولا تغنى من جوع فاصبح حالهم كحال كلب المدينه ياكل مهما ياكل ولكنه لا يزال ضعيفا .

ملحوظه فقط :

اعلم جيدا ما فى الكوسه من فوائد كما نصحنا بها الرسول الكريم عليه الصلاة والسلام .

الجيش المصري

"الجيش المصري تأديب وتهذيب"

عبارة صعبة جدا فعلا من كتر التجارب اللي انا سمعتها من الناس اللي سبقوني ودخلو الجيش مبقتش فاهم مقصودها بالضبط بس اللي انا متأكد منو انهم ميقصدوش المعنى الحرفي بتاع العبارة دية إطلاقا جائز الهدف من العبارة دية انها تكون واجهه محترمة للمعني الأصلي اللي بيطبقو بية التأديب والتهذيب على طريقتهم الخاصة وانا متأكد جدا انها خاصة لان للأسف الجماعة اللي المفروض ان وظيفتهم انهم يطبقو العبارة دية ميعرفوش اي حاجة عن التأديب والتهذيب اللي احنا نعرفو بس بيعرفو نوع تاني "من التأديب والتهذيب" احنا مبنعرفوش بقى غير لما بندخل الجيش وساعتها بنقول ياريتنا ماكنا عرفناة

انا مش قصدي اكون متشائم خالص بس انا متأكد جدا ان الجيش تجربة مهمة جدا اومجموعة من التجارب اللي بتضيف للشخصية سمات قوية وايجابية وبتمحي كتير من السمات السلبية لوالواحد عرف يستفيد منو صح . انا شخصيا لاحظت اختلافات ايجابية في سخصيات ناس دخلو الجيش من الناس اللي انا اعرفهم.

الجيش في مصر "في إعتقادي الشخصي" الهدف منو مش اعداد الشاب المصري اعداد عسكري وتجهيزة ليكون قادر على خوض المعارك الحربية ولاكن الهدف الحقيقي من الجيش المصري هو اعداد الشاب المصري ليكون قادر على المعيشة في مصر يعني بيعودوا على الطوابير الإتظار الطويل وكيفية البحث عن واسطة علشان يستريح في الحياة وغيرو وغيرو من الامور اللي احنا بناخد في وقت اطول علشان نتعلمها برا الجيش.

واخيرا احب اختم ووضح حاجة صغيرة كنا ومازلنا بنسمع حديث عن النبي علية الصلاة والسلام بيقول " جند مصر خير اجناد الارض" الحديث دة حديث موضوع وليس لة اي اساس من الصحة ودة كلام الشيخ ابو اسحاق الحويني عالم الحديث والسنة النبوية الشريفة. ياريت كلنا نعرف المعلومة دية علشان نكون عارفين اكتر بالواقع اللي احنا عايشين فية وعلشان ما تاخدناش العظمة قوي.

مصر

مصر

مصر أو رسمياً جمهورية مصر العربية، هي دولة تقع في أقصى الشمال الشرقي من قارة أفريقيا يعني على يمينها البحر الاحمر وفوقها البحر المتوسط ونهر النيل يشقها نصفين تقريبا تحكمها اسرة مبارك من قديم الازل إن صح التعبير, ففترة حكم السلطان محمد حسني مبارك تتجاوز اعمارنا نحن الشباب وخلال هذة الفترة يتم اعداد السيد/ جمال مبارك نجل السلطان لإستلام مقاليد الحكم ليكون سلطان مصر القادم نظرا لتقدم سن السيد الوالد.
 

من المفترض ان يكون الحكم مسؤلية كبيرة ويتم اختيار الحاكم باستخدام مقايس معينة وانتخابات طبعا ووجع دماغ . لكن الحمدلله هنا في مصر الحكومة هي اللي بتتولى اختيار الرئيس وانتخابة طبعا بعدد كافي من الاصوات الوهمية كل ده علشان يريحو المواطن من المجهود الفكري ووجع الدماغ بالتفكير في بكرة وانا شايف ان دية ميزة مش موجودة عند اي بلد تاني غير مصر.
 

معظم الناس فاكرة ان الناس اختيار الرئيس اللي بيتمنوة زي البرادعي مثلا هو اللي هيقلب كفت الميزان وهيصلح الوضع والدخل هيتحسن ....الخ. بس مشكلتنا للأسف مش في مين اللي هيحكم الفترة اللي جاية المشكلة في المصريين نفسهم. 

بنلاحظ دايما ان الناس بتتكلم عن النهب اللي بيحصل في البلد وقد اية بيظهروا من سخط بسبب فشل النظام والتأخر اللي احنا فية وفي نفس الوقت بنلاحظ برضو ان اكتر من 80% من الموظفين في البلد عندهم مشكلة في مراعاة الضمير زي المدرسيين مثلا الموظفين في المصالح الحكومية...الخ. قد اية اتبهدلنا علشان نخلص ورق ولانقضي مصلحة بسبب موظف تافة فاكر انو ماسك الناس من رقيبهم علشان الكرسي اللي قاعد علية. طلب الرشوة بقي علني السرقة بقيت حاجة عادية بالعكس بقيت شطارة وفهلوة. المشكلة مش مشكلة رئيس وبس المشكلة اعمق من كدة بكتير.
 

احنا هنا في مصر بنحب نرمي بلانا على غيرنا فعلا السبب الاول للتأخر هو انعدام الضمير عند معظم الناس واستحلال الحرام. معظم الناس هنا في مصر لما بتجيلها الفرصة انها تسرق مبتترددش. لو جينا نبص على الصورة من بعيد هنلاحظ ان الموظف اللي فوق زي الموظف اللي تحت بالضبط الفرق بينهم ان الاول لحق الماسورة من اولها.

والسبب التاني للتأخر قصور الحكومة واكيد كلنا متفقين على السبب دة, اولا القصور في الخدمات بشكل عام زي الصرف الصحي والمياة الشرب اللي مبتصلحش للاستخدام الادمي في اماكن كتير زي الصعيد والشرقية وغيرها وغيرها ثانيا سوء التخطيط زي ما بنشوف في تصميمات الطرق والكباري وسكك الحديد والمرور اللي بسبب الاخطاء الفادحة اللي فيها الاف الناس ماتو, وسؤ التخطيط للمستشفيات والمدارس والمصالح الحكومية الاخرى......الخ. الكلام فعلا كتيير قوي في اللي ممكن يتقال عن الحكومة واخطأها وعن الاراضي والقصور اللي بتتوزع على الحابل والنابل والناس شايفة ومحدش قادر يتكلم , فعلا عرفو يكسرونا من جوة وعرفو ازاي يزرعو الخوف فينا.

بعض مظاهر الخلل في ادارة المرور اللي حتى الاجانب مستغربين عليها

مشهد للاعداد الهائلة قدام السجل المدني علشان يعملو شهادات ميلاد "كومبيوتر!" علشان سعادة وزير التموين فتح باب تسجيل لفترة محدودة للناس اللي مسجلوش العيال الصغيرة في البطقات التموينية علشان يخدو شوية زيت ورز زيادة

اعتزل ياجدو

هو ايه اللى هيحصل فى الدنيا يعنى ياجدو لو تسيبوا الشباب تاخد فرصتها , الناس الكبيره دى عايشين فى وهم الخبره , لازم يعرفوا ان هو ده تقريبا السن المتعارف عليه فى الدنيا كلها لاداره الامور ولكن بعد كده يكون للاستشارات بس , وبعدين يا جد انت وهو احنا عايزين نريحكوا

انتوا ايه مبتتهبطوش ده انا طلعت على الدنيا لقيتكوا زى مانتوا دلوقتى وهموت ونتوا مكانكوا انتوا لزقتوا ولا ايه انتوا مبتشفوش الناس اللى بره وهى عامله مظاهرات على سن التقاعد علشان زودوه بس سنتين فى فرنسا , طبعا انتوا اصلا بتمدوه لاجل غير مسمى  انتوا مبتتكسفوش لما تشوفوا مجلس العموم البريطانى والوزراء والنواب اللى فيه حرام عليكوا جبتولنا احباط , نفسى اشوف بقه واحد عليه القيمه فى البلد دى وسنه صغير لكن يظهر العرق الفرعونى لسه موجود

شوف كده معايا ياجدو واحد قد عيل من عيالك , رئيس وزراء بريطانيا 44 سنه , ودى بريطانيا ياجدو

David Cameron : 44

ده وزير الخزانه البريطانيه 39 سنه

George Osborne : 39

شوف الاتنين دول بقه حاجه تقهر بصحيح  رئيس حزب العمال البريطانى 41 سنه  - اكبر حزب فى بريطانيا - وأخوه 45 سنه كانوا بيتنافسوا على رئاسه الحزب من كام يوم فى انتخبابات شفافه يا جدوا زى انتخاباتنا بالظبط اللى انت دايما مكتسحها , الغريبه يا جدوا ان الاصغر هو اللى فاز 

      

David Miliband : 45                         Ed Miliband : 41

الفيديو ده فعلا بيوضح قد ايه احنا متخلفين عن الناس دى , فى الفيدو ده وزير الماليه الشاب التابع لحزب رئيس الوزراء - علشان كده قاعدين جنب بعض -  ضد وزير الداخليه 58 سنه اللان جونسون التابع لحزب العمال المعارض - علشان كده هو جنب رئيس حزب العمال ايد مييليباند اللى عنده 41 سنه فى الناحيه التانيه - يعنى وزيرين فى حكومه واحده من حزبين معارضين جدا لبعض وشوف بيتنافسوا ازاى .

وبعدين ياجدوا خد عبره من الرسول عليه الصلاه والسلام لما ولى قياده الجيش لاسامه بن زيد وهو لسه شاب وغيره

كيف تصبح مصريا 100 في الـ100

·      لما بتكون الاشاره حمرا ده لو انت في حته فيها اشاره اصلا بتحس ان ده اختراع رخم وملوش لازمه هما المشاه مش عارفين يستنوا لغايه الطريق ميفضا او يعدوا من وسط العربيات ؟! هو بصراحه عندك حق انت بتخرج متاخر علي ميعادك نص ساعه وعاوز تلحق توصل متاخر ساعه واحده بسهوا كده احنا كمصرين مبنحبش الكــيود !!

الحاجه العبقريه في المصريين انهم من اشد انصار النظريه النسبيه في العالم كله . بجد دي حقيقه واقعه اقولكم ازاي .

المصري مش زي كل الناس في العالم بيسيب ساعته زي ماهيه وهو راكب العربيه لا هو دايما بيقدمها من 30 لـ45 دقيقه  بالنسبه للمراقب (اللي هو الشخص اللي مستنيه في مكان ما ) علشان طبعا هو ماشي بسرعه معينه(اقل من سرعه الضوء) بالنسبه للمراقب.

 

وعلي حسب النسبيه بيكون فيه  )تاخير زمني ) 

  يعني المراقب(الاخ اللي مستني ) بتكون ساعته مأخره شويتين وعلشان كده الاخ اللي سايق العربيه لما يسأله الاخي اللي مستنيه دايما بيقوله هوصلك بعد ربع ساعه وهو لساله ساعه علي  الاقل علي ما يوصل .من هنا بتبان عبقريه المصري !!!  

·      بتكون متضايق لما تقف في طابور العيش (اذ اكنت بتاكل عيش من بتاع العامه ) او اي طابور تاني يعني (مهو الطوابير ملهاش اخر ) وبتحس انك المفروض تاخد الاول لانك مبتحبش الانتظار وبعدين (انت مستعـــــــــــــــــجل) دوننا عن كل الناس!!!

في جمله هوليوديه خالده بتقول (يا صاح ,لقد  ُوجدت القوانين لكي نكسرها ) دايما الكتّاب بيحشروها في النص علشان يدوك الشعور بصياعه الواد البطل اللي مبيهموش من  اياتوها حد .  

لكن لما تيجي للتنفيذ تلاقي ان الجمله دي اتقالت في امريكا علشان تتنفذ في مصر !! 
يعني عمرك متسمع ان في حد في امريكا يجي من جنب الطابور من علي اليمين وبكل برود وتلامه يخترع حجه انه عاوز ينجز مصلحته في السخان علشان مثلا راكن عربيته مخالف !!! او نسي يحط للكلب اكل الصبح وزمانه جعان!!! او نسي كنكه الشاي علي البوتجاز ولازم يرجع يطمن علي البيت !!! او مراته جالها الطلق وسايبها بره !!!! علي ما يخلص المصلحه .....الخ الخ الخ. 

·         اكتر شعب في العالم كله بيتباها بحجات مش بتاعته والامثله تنوء بها الجبال الرواسي منها مثلا: 

احنا احفاااااااااااد الفراعــــــنه الواحد يجي يبص في كتب التاريخ تلاقي ان الفراعنه دول كانوا ناس مفتريه وجبابره ومنهم اللي ادعي الالوهيه وكانوا بيسلموا مصر من عائله لعائله زي منكون انتريه  

لو جيت تبص حتي علي الشعب وقتها كانوا ناس خاضعين خانعين ينقالهم يمين هيا يمين شمال شمال !!!!!

اللي ياكد الكلام ده الاهرامات !!! تلت رصات حجاره علي شكل هرمي قال ايه يدفنوا فيها بسلامتوا الفرعون طب ميتهبب يدفن زي خلق الله  !!!!

20 ســــــــــــــــــــــــنــــــــــــــة بينقلوا ويرصوا شويه حجاره بالاطنان واللي يموت يموت فيه غيرهم!!! واحنا زي الهبل بنفتخر بالاهرام جتنا نيله !!!!!

بعيدا عن التاريخ : كل واحد بيتباها بدكتور ولا مهندس ولا ظابط ولا اي وظيفه ليها شمخه زي ميكون هو الشخص اللي بيتباها بيه !!!!!
معندناش اي اعتراف بقول الشاعر 
ليس الفتي من قال كان ابي         ان الفتي من قال ها انا ذا

انا ابن خاااااااااااااالتي مركزه عالي قوي في البلد (تلاقيه ساكن عالسطوح يا خويا)

  

قمر تايه ياولاد الحلال

قمر صناعى تايه ياولاد الحلال اللى يلاقيه يتصل بالهيئه القوميه للاستهبال عن بعد وابحاث الفضا وله الاجر والصواب عند الله

 

لما قرأت الموضوع ده اختفاء القمر الصناعي المصري «إيجيبت سات 1» فى المصرى الزفت وبتهيالى ان الكاتب اخطأ فى العنوان لانه كان المفروض يبأه اسمه هروب القمر الصناعى ايجيبت سات 1 او ....القمر الصناعى ايجيبت سات 1 طفش او خلع او هاجر, زى الناس العاقله اللى بتعمل دلوقتى

وده بيأكد ثقافه الهجره الشرعيه والغير شرعيه بس هنا القمر يكسب يا معلم لانه طفش ومعاه 21 مليون دولار يعنى لا تقولى اشرف السعد ولا لكح ولا غيره , ضربة معلم يعنى وكان الخبر بيقول

فقدت «هيئة الاستشعار عن بعد وعلوم الفضاء» اتصالها بالقمر الصناعى البحثى «إيجيبت سات ـ 1»، منذ 3 أشهر , وأشار المصدر إلى أن إعادة التحكم فى القمر قد تحدث فى أية لحظة، وأن فقدان السيطرة عليه كان قد حدث مرتين من قبل، واستطاعت الهيئة التقاطه بعدهما لافتاً إلى أن السبب قد يرجع إلى نفاد الطاقة من بطاريات القمر

اللى يضايقك فعلا انه بقاله 3 شهور تايه ده لو عيل تايه فى مصر 3 شهور كانوا فقدوا فيه الامل مش قمر ..صناعى .. تايه فى الفضاء وشويه ويقولك احنا بنحاول نتحكم فيه تانى ومتعودين على كده لانه طفش قبل كده مرتين وجبناه وكأنهم بيلعبوا استغمايه او القمر معرفش يطفش المرتين اللى فاتوا , لكن انا بقولكوا التالته ثابته وبعدين ده فضاء ياعم الحاج , ويقولك ان احتمال البطاريات فضت , ما هى لو كانت انرجايزر " 6 مرات اقوى " كنا عرفنا نجيبه من قفاه

لكن كل اما تزود شويه فى قراءه الخبر ونفسك تغمض عنيك لكن مع صحيفه المصرى الزفت مش هتقدر تغمض عنيك .

وأضاف أن المشروع الفضائي المصري أصبح يعاني العديد من المشاكل، خاصة بعد هروب العديد من المهندسين المصريين الذين تدربوا على إدارة القمر على يد الخبراء الأوكرانيين، وتوجههم للعمل فى برامج فضائية بعدد من الدول العربية، عقب مغادرة الخبراء الأوكرانيين موقعي تحكم واستقبال صور القمر على طريقي «مصر - الإسماعيلية» و«أسوان»، وتسليمهما للإدارة المصرية

أكيد المدَربين قالوا ياعم استشعار عن بعد ايه ونيله ايه خلينا فى الصواريخ الارضيه " قصدى الفلوس " بتاعة الفضائيات أهو منها فرجه ومنها فلوس , يا ولاد الصواريخ

 وكان لازم يكون ختامها مسك , هو الحقيقه مش مسك قد ماهو امساك - أعزكم الله

وأشار المصدر إلى أن القمر تم إطلاقه من على متن الصاروخ الروسي «دنيبر-1» في 17 أبريل 2007 من قاعدة باكينور لإطلاق الصواريخ بكازاخستان، بعد تأجيل موعد إطلاقه مرتين، مضيفاً أنه تكلف ٢١ مليون دولار، من بينها ٦ ملايين دولار تكلفة الإنشاء، و١١ مليون دولار أبحاثًا ورواتب وإقامة للخبراء والمهندسين، و٣ ملايين دولار تأمينًا، وأشار إلى أن القمر يدور حول الأرض مرة كل ساعة ونصف الساعة، ويلتقط صوراً وخرائط بدقة 8.7 متر، وأن تشغيله يكلف مصر ٣٥ مليون دولار سنوياً.

ماهى فلوس ابوكوا , 21 مليون دولار تكلفة انشاء و 35 مليون دولار سنويا ياما نفسى فى صاروخ من دول يقعدوا عليه المسؤول عن الخطأ ده " زى سليمان الحلبى " ويطلؤووه مش يطلقوه ويتوه براحته فى الفضاء

معلومه مش هتفيدك ولا هتريح بالك وتهدى اعصابك

Mission	Sponsor	Spacecraft contractor	Launch mass   (kg)	Launch date

EgyptSat-1      NARSS Egypt     Yuzhnoye Ukraine        100                               17 Apr.  2007

 

!!ميرسي يا حكومه

دعونا نعترف كمصريين ان للحكومه الكثير والكثير والكثيييييير  من الايجابيات!! ومنها (علي سبيل المثال لا الحصر)

اولا-        الطوابير!  ايوه الطوابير ,عيش وانابيب وبنزين ومعاشات وفواتير تليفون... الخ الخ الخ وذلك لان الطوابيرعامل اساسي في تحضر المجتمع المصري وكما قال الشاعر( طوابير طوابير طوابير مستنين ايه مش عارفين) واللي مش مقتنع باهميه الطوابير اقوله خد عندك مزايا الطابور!!!

 

1 - تقارب المصريين من بعضهم البعض بشده .

2- توسيع دائره معارف المصري .

3-تعليم الشعب الصبر وضبط النفس)واللي مربهوش ابوه وامه الحكومه تربيه).

4-تنميه روح الابتكار والتخيل في كل شخص مصري وشخصه مصريه (يعني لما تروح من جنب الطابور وتعتذر للناس انك لازم تمشي بسرعه علشان حجه من الحجج لازم تكون الحجه مقنعه ومبتكره يعني محدش استخدمها قبلك).

5-تكفير (ذنوب) الانسان المصري الاصيل (وفي بعض الاحيان ممكن نشيل كلمه ذنوب ).

6-اجبار الانسان المصري علي ممارسه الرياضه التي عزف عنها (وخصوصا تقويه عضله السمانه).

ثانيا الحفاظ علي ذاكره المواطن من خلال عدم شغل ذاكره المواطن باسماء العديد من السياسيين والقاده والرؤساء (يعني هو رئيس واحد يقعد 30 سنه ورئيس مجلس شعب واحد يقعد 30 سنه ووزير دفاع واحد يقعد30 سنه.... وهكذا ) !!!!

ومثال لاثبات صحه النظريه مين يعرف رئيس وزراء انجلترا الحالي ؟؟

طبعا واحد او اتنين من كل 100 ممكن يعرفوه هي الناس هتفتكر ايه ولا ايه  وهنا ينتج خطأ الانجليز وغيرهم من الشعوب (الغير اصيله واللي تهون عليها العشره  بسرعه!!)

ثالثا التدريب المتواصل للمواطن علي الاستعداد لاي كارثه بيئيه او حرب مقبله!!! علشان كده لما تحصل كارثه في بلد والعياذ بالله متقدمه بتكون خسايرها كبيره لان الناس مش مدربين!!! فمثلا 

يتم تدريب المواطن علي قطع المياه لفترات طويله خشيه ان تنفذ دول حوض النيل تهديدها بقطع المياه عننا.

يتم تدريب المواطن علي الاستعداد لتوقعات غرق الدلتا وذلك بتعمد انفجار مواسير المجاري ليعيش الناس في جو مماثل للجو المتوقع بعد غرق الدلتا وايضا تخريج جيل قادر علي استخدام الزوارق والمراكب الشراعيه.

 
يتم قطع الكهربا لفترات طويله للتدريب علي حدوث كارثه في السد العالي .

رابعا مواجهة التحديات والظروف الجبريه باستخدام اسهل الطرق وارخص الطرق واكثرها فاعليه!!!

مواجهة التضخم السكاني بالطناش وهو ارخص وسيله واكثرها فاعليه حيث 

 -تطنش الحكومه الطرق فينتج اعلي معدل وفيات الطرق في العالم!!!

-تطنش الحكومه الامراض الفتاكه فينتج اعلي معدل وفيات بالكبد والكليه 

والقلب (وباقي الكرشه).

مواجهة البطاله بتوفير الموبايلات من كل الانواع والماركات ودول المنشأ لذوم التسليه علي المساطب.

وبقي اخيرا بعد ان عرفنا الحقيقه الدعاء للحكومه دعوه حلوه كده زي وشها !!! قولوا ورايا

الهي وانت جاهي يا حكومه .................... بصراحه مبحبش الادعيه المحفوظه كل واحد يدعي زي مهو بيحب الدعوه لازم تطلع من القلب علشان ربنا يستجيب ان شاء الله

هذا هو الفرق

بالامس وانا أشاهد فيلم وثائقى جميل Mega Structures - Sea Launch شاهدت لقطه غريبه اثناء عرض الفيلم وهذه اللقطه تبين مرور السفينه Ocean Odyssey العملاقه من قناه السويس وهذه هى اللقطه المعروضه التى أتحدث عنها .

ومثل هذه اللقطه توحى بان المخرج للفيلم اعتبر ان وجود رجل يركب حمار على شاطئ القناه يعطى " مصداقيه " للفيلم , او انه يستخف بالمصريين او انه اثناء تصويره للفيلم وجد هذا الرجل بالصدفه فعلا ينظر على السفينه وهى ماره وهذا صعب اذا ما اعتبرنا انه من الصعب وجود فرصه لتواجد حمار على شاطئ القناه .ولكن بالتأكيد ودون ادنى شك ان هناك استخفاف بمصر والمصريين والعرب فى الخارج بدليل هذه اللقطه فتشعر وانت تشاهدها انهم يصنعون هذه السفينه العملاقه لاطلاق الصواريخ والاقمار الصناعيه من البحر ونحن لازلنا نعيش فى عصور ركوب الدواب للسفر .ولكن وللاسف الشديد هذه تقريبا هى الحقيقه , لان اهتماماتنا متغيره عن هذه الدول ففى حين انهم يفكرون فى كيفية توفير الميزانيات ليس للبحث العلمى فهذا أمر منتهى ولكن توفير ميزانيات أكبر لاكتشاف الفضاء , وفى نفس الوقت نفكر نحن فى تقليل استهلاك الطاقه الكهربيه بقطع الكهرباء بنسبة 50 %  وتقليل الدعم للسلع التموينيه الاساسيه والغريبه انها بأمر حكومى .

يمكنك تنزيل الفيلم Mega Structures - Sea Launch من هنا